Presidenti Shteteve të Bashkuara të Amerikës, Donald Trump mohoi t’i ketë kërkuar FBI-së të heqë dorë nga hetimi ndaj ish-këshilltari i tij për sigurinë kombëtare, Michael Flynn i cili pranoi fajësinë se ka gënjyer në çështjen për ndërhyrjet ruse gjatë fushatës së zgjedhjeve presidenciale të fundit.
“Nuk i kam kërkuar asnjëherë Comey për të hequr dorë nga hetimi për Flynn. Përsëri informacione të pavërteta që mbulojnë një tjetër gënjeshtër të Comey”, u shpreh Trump në Twitter.
Gjatë një seance dëgjimore në fillim të qershorit në Senat, ish-drejtori i FBI-së, James Comey konfirmoi se Donald Trump i kishte kërkuar personalisht të mbyllë hetimin ndaj Michael Flynn.
Të shtunën, Donald Trump rikonfirmoi se nuk ka patur asnjë marrëveshje të fshehtë të stafit të fushatës ndërsa aspironte drejtimin e Shtëpisë së Bardhë me Rusinë, duke drejtuar gishtin nga Departamenti i Drejtësisë, si dhe ish-rivalja e tij demokrate, Hillary Clinton.
