Dhe tre ditë na ndajnë nga ndeshja e madhe që kick-boxeri Florian Marku do të zhvillojë për herë të parë në Tiranë në pallatin e sportit “Asllan Rusi” përballë rivali serb, Sladan Dragisiç. Marku është stërvitur për më shumë se 2 muaj për këtë ndeshje dhe beson se i ka të gjitha shanset që të dalë me një fitore.
Boksieri serb është shprehur për mediat vendase se do të vijë të luftojë si burrat në Tiranë, ndërsa nga ana tjetër, nëpërmjet një interviste në “Wake Up”, Marku është shprehur se nëse kundërshtari i tij do e bëj këtë gabim, atëherë ndeshja do të mbyllet që në raundin e parë dhe rivali përfundon pa ndjenja.
“Dëshira ime është që t’i dhurojë spektakël publikut dhe të ndeshem në këmbë me grushte me kundërshtarin. Nuk janë të mira për publikun ato lloj “përqafimesh” që bëhen në ring, në formën e mundjes. Unë kam qejf grushtin dhe serbi ka thënë në një intervistë për mediat serbe, se do të luftojë si burrat ndaj meje, duke grushtuar në këmbë dhe të shohim se kush do të fitojë.
Megjithatë unë i them shqiptarëve se nëse ai e bën atë gabim me mua dhe ndeshet në këmbë, atëherë ndeshja përfundon shumë shpejt. Serbi ka për ta parë veten pa ndjenja. Taisoni kishte 20 e ca ndeshje që i mbyllte takimet në raundin e parë, pavarësisht se publiku paguante 5000-6000 euro për biletat. Tani shpresoj që edhe ndeshja ime të mbyllet po kaq shpejt”, ka thënë Marku.
