Një natë më parë Florian Marku vërtetoi edhe njëherë se nuk njeh kundërshtarë kur zbret në kafaz. Në përballjen e zhvilluar të premten në Ferizaj, në ringun e pallatit të sportit “Bill Clinton”, ai shkatërroi rumunin Ioan Vranceanu. Markut nuk e ka zgjatur shumë edhe këtë sfidë, pasi e ka mbyllur që në raundin e dytë.
Sfida ishte e vlefshme për Mixed Martial Arts (MMA), ku Marku shpreson q të jetë ndeshja e fundit pasi tani shprehet se është gati për të bërë hapin e madh për në UFC. Kohët e fundit Floriani është parë duke u stërvitur me kampionin tjetër shqiptar, i cili është renditur në pesë më të mirët në UFC, Ilir Latifin.
Në sfidën e zhvilluar në ringun e pallatit të sportit “Bill Clinton”, “Dinamiti” shqiptar dominoi totalisht kundërshtarin duke e bërë atë të dorëzohet që në raundin e dytë të sfidës me knock out. Ajo që binte në sy ishte se rumuni gjatë gjithë dueli shmangej dhe vraponte në kafaz, pasi nuk mund tu rezistonte grushteve të Markut. “Qëllimi im është që të arrij UFC-në dhe së shpejti do të më shikoni atje”, tha menjëherë pas dyluftimit kampioni. Gjithashtu ai përsëriti ambiciet për të shkuar në majën më të lartë të këtij sporti, në UFC.
