Botërori i Rusisë deri tani i ka thyer të gjitha parashikimet e tifozëve për ekipet që do të avanconin. Surpriza më e madhe është kualifikimi i Rusisë përballë Spanjës, një ndër ekipet më të forta në këtë Kupë Bote. Heroi i rusëve ishte portieri, Igor Akinfeev, i cili vendosi kualifikimin pasi priti dy penallti. Ishin Koke dhe Aspas viktimat e veteranit rus, i cili pohon se ishin përgatitur për penalltitë. Duke pasur edhe një trajnerë që në karrierën e tij ka qenë portierë, kjo mund të ishte pika më e fortë ku rusët ndjeheshin të sigurt se mund t’ia dilnin.
“Jemi shumë të lumtur, por edhe shumë të lodhur, sepse, sikurse e patë, gjatë pjesës së dytë dhe në shtesa u mbrojtëm shumë, duke ia dalë mbanë me sukses. Duhet të jem i sinqertë, shpresonim te penalltitë, sepse është gjithmonë e vështirë të luash kundër Spanjës. Dhe kështu ndodhi.
Po luajmë një kampionat fantastik dhe besoj se janë përfshirë në këtë atmosferë jo vetëm tifozët rusë. Të gjithë e kanë kuptuar tani se Rusia është një vend ku futbollistët dinë të luajnë futboll, duan të luajnë futboll dhe se është një komb në gjendje për të festuar”, komentoi Akinfeev.
“Tek penalltitë që prita, e dija fare mirë se ku do të shkonte topi. Pata edhe fat”, deklaroi portieri. Kur u pyet për përballjen ndaj Kroacisë, Akinfeev tha: “Ndjek vetëm skuadrën time. Kam parë disa ndeshje në Botëror, por Kroacinë nuk e kam parë”.
