Në një takim me strukturat dhe banorët e njësisë nr.7 në Tiranë, kreu i PAA-së ka treguar arsyet përse vendosi të mos regjistrohet në zgjedhje.
Sipas tij, janë dy arsyet e PAA-së, lidhur me vendimin për të bojkotuar zgjedhjet:
“Përse Partia Agrare Ambientaliste ka vendosur të mos regjistrohet në zgjedhje me këtë qeveri? Pse është bërë palë me Partinë Demokratike dhe aleancë me opozitën? Për dy arsye. Arsyeja e parë është sepse nuk garantohen zgjedhje të lira dhe të ndershme dhe për këtë ju jeni të gjithë dëshmitarë që zgjedhjet e pjeshme të 2015 patën shumë problematika në të gjithë Shqipërinë.
Partia Socialiste punën e parë që bëri tha se sapo të vinte në pushtet do të shfuqizonte ligjin e mbetjeve, përkundrazi tani po tenton me të gjitha manyrat që ta realizojë atë, pra të lejojë futjen e mbetjeve në Shqipëri. E gjetur përballë kësaj situate, për këto dy arsye, që janë arsye sublime, pra për zgjedhje të lira dhe të ndershme dhe për të gjithë çështjet me të cilat merret Partia Agrare Ambietntaliste ndjehet e tradhëtuar, nuk është realizuar asgjë nga ato që ka premtuar PS, ne jemi të detyruar të marrim këtë vendim i cili është i vështirë, nuk është një vendim i lehtë për t’u marrë. Është një vendim i sforcuar në një situatë të sforcuar”.
Por, pas një fjalimi të gjatë, Duka ka habitur me veprimin e tij, sepse duket se ai nuk i qëndron 100% vendimit për të bojkotuar zgjedhjet.
Kështu, në takim u prezantuan dy kandidatë për deputetë të PAA-së për Tiranën, ndërkohë që Duka tha se nuk do marrin pjesë në zgjedhje.
Jo vetëm kaq, por, pas prezantimit të Adi Haxhiymeri dhe Arben Tafajt si kandidatë për deputetë, kreu i PAA-së tha se partia e tij është “alternativa e duhur”, duke bërë kështu fushatë për partinë e vetë.
Vallë, përse duhej të prezantonte kandidatët për deputetë, zoti Duka, nëse ka vendosur të mos marrë pjesë në zgjedhje? Apo ky është një vendim që do të ndryshojë në momentin e fundit të afatit të regjistrimit?
Kjo mbetet për t’u parë!
