Agron Kuliçaj, ish-zëvëndësdrejtori i Policisë së Shtetit, ka folur për herë të parë për vrasjen e Artan Cukut.
“Janë ditë të trishta për policinë shqiptare”, kështu e nis rrëfimin e tij, Kuliçaj, teksa shton se kjo vrasje është dëshmia më e qartë e shitjes te krimi, që shteti u bën punonjësve të policisë.
Ai tha për Gazetën Shqiptare se pista për hakmarrje nuk qëndron, dhe tregon se cili ka qenë pengu i mikut të tij.
“Pistën e hetimit për hakmarrje e përjashtoj. Duhet hulumtuar çeshtjet që ka ndjekur, kryesisht në Vlorë, në drejtim të goditjes së grupit të narkotrafikut dhe personave që janë ekstraduar në Itali, pasi ishin në kërkim ndërkombëtar”, shprehet Kuliçaj.
Teksa u pyet lidhur me pengun e Cukut, ai tha: “Ai u nda nga kjo jetë me mendimin se do të rikthehej në polici një ditë e për t’i shërbyer prapë me aq pasion dhe profesionalizëm, ashtu si dinte. Për fat të keq ky mbeti pengu më i madh i tij, edhe pse me vendim të formës së prerë nga gjykata, drejtuesit e lartë të Policisë së Shtetit në kundërshtim me vendimin e gjykatës, refuzuan ta kthejnë në detyrë”.
