Krimi i organizuar dhe korrupsioni mbeten edhe ngërçet drejt BE-së. Raportuesi për Shqipërinë, Knut Fleckenstein, ka dhënë lajmin e mirë për të gjithë shqiptarët, se Gjermania është e bindur për hapjen e negociatave me Shqipërinë, por nuk duhet të entuziazmohemi kot, pasi ka ende punë për tu bërë në këtë drejtim.
Në një intervistë ekskluzive për “ABC News”, Fleckenstein citon se parakushtet për hapjen e negociatave janë përmbushur, dhe ky është qëndrimi i pothuajse të gjitha grupimeve politike në Parlamentin Evropian dhe Komisionit Evropian.
Sipas Fleckenstein, e rëndësishme është që edhe nëse ka kushte, vendimi të mos kthehet sërish në Këshillin e Ministrave, pas raportimit të mëtejshëm të Komisionit Evropian.
“Mesazhi kryesor është që parakushtet e përcaktuara për hapjen e negociatave të anëtarësimit të Shqipërisë në BE, janë përmbushur. Kjo nuk do të thotë që puna ka mbaruar.
Ne e dimë që ka probleme. Po, ka probleme me krimin e organizuar dhe korrupsionin. Edhe Reforma në Drejtësi është në zbatim e sipër, por nuk është zbatuar gjithçka.
Pra, ka kaq shumë punë përpara. Duhet të përqëndrohemi te çështja e pronës, tek rritja ekonomike, punësimi dhe shumë kritere të tjera. Së pari, për qeverinë e Tiranës, por edhe për ne, për të mbështetur dhe për të promovuar këtë punë, nëse ajo shkon në drejtimin e duhur.
Por parakushtet për hapjen e negociatave janë përmbushur dhe ky është qëndrimi i pothuajse të gjitha grupimeve politike në Parlamentin Evropian dhe Komisionit Evropian”.
