Çështja e pagave është kthyer sërish në një problem për skuadrën e Flamurtarit. Futbollistët nuk kanë marrë rrogat që në nisje të sezonit, ndërsa u tha se në momentin e kontratës lojtarëve u është dhënë 30 për qind në dorë.
Lojtarët janë në pritje të pagave, ndërsa klubi është në luftë me kohën teksa më 4 janar grumbullohet ekipit.
Por tashmë ekziston frika se lojtarët mund ta hedhin në gjyq klubin. Kjo pasi në bazë të rregullores, në rast se lojtari ka 3 muaj pa u paguar, ka të drejtën që ta ankimojë çështjen në FSHF ose FIFA.
Por, ky nuk është rasti i parë që ky ekip ka probleme me pagat, teksa pak vite më parë, lojtarët bojkotuan stërvitjen dhe u larguan në kohën që drejtoheshin nga trajneri Stanislav Levi.
Ky i fundit u largua bashkë me një grup lojtarësh që kishte sjellë vetë, hodhi në gjyq klubin dhe e fitoi, raporton Panorama. Administratori i Flamurtarit, Sinan Idrizi, pranon përgjegjësitë e tij për situatën dhe premton se çështja e pagave do të zgjidhet dhe se gjithçka është një ngërç procedurial.
