Flamurtari nuk ka mundur që të marrë më shumë se një barazim në transfertën me Luftëtarin në Gjirokastër. Vlonjatët nuk mundën të përfitojnë për të marrë vendin e dytë i cili do të arrihej vetëm në rast fitoreje. Shansin e kishin por nuk arritën të mbrojnë rezultatin e pjesës së parë, pasi u barazuan nga një ish-lojtarë i tyre, Dejvi Bregu.
Luftëtari e nis me agresivitet sfidën, duke ushtruar presion në gjysmëfushën e Flamurtarit. Fillimisht Rroca me një gjuajtje të pasaktë dhe më pas Bregu me një asist për Abazajn, që kontrollohet nga portierin kuqezi Nurkovic, japin shenjat e para të një sfidë mjaft të luftuar. Flamurtari në rastin e parë të rrezikshëm që iu afrua zonës së bluzinjve (26) realizoi me brazilianin Juffo, i asistuar nga Liçaj. Vendasit nuk mund të pajtoheshin me këtë rezultat, por Abazaj sërish nuk arrin ta mposhtë portierin Nurkoviç.
Pjesa e dytë është më ngulmuese për vendësit, që kërkojnë të barazojnë shifrat. Flamurtari aplikon kundërsulmin, me synimin për të dyfishuar rezultatin dhe mbyllur gjithçka. Në minutën e 53-të është një rrezik potencial në zonën vlonjate. Godet tokazi, brenda në zonë, Eri Lamcja, por pret portieri mik. Në minutën 67-të është Danilo Alves, që në dy goditje radhazi brenda zonës gjirokastrite, vë në provë portierin Ruçi, i cili pret në pozicion. Ndërsa në të 80’ minutë mbrojtja vlonjate do të dështonte të linte ne pozicion jashtë loje Bregun, i cili del i vetëm përballë portierit Nurkoviç dhe barazon shifrat. Pjesa e mbetur prodhon spektakël me të dyja ekipet në kërkim të golit por që dështojnë të shënojnë.
Luftëtari me këtë pikë të fituar mbetet sërish në zonën e rrezikut me 10 pikë, duke pasur një sfidë mjaft të vështirë mbijetese. Ndërsa Flamurtari kishte shansin më të mirë të merrte vendin e dytë, por ngelet në kuotën e 22 pikëve po aq sa Kukësi dhe 1 pikë më pak se Kamza në vendin e katërt.
Luftëtari – Flamurtari 1-1
Golat: Bregu 80’ / Juffo 26′
Luftëtari: Ruçi, Toledo (Janku 60’),, Beqiri, Zeqaj, O.Rapa, Ramadani, Aleksi, Rroca (D.Rapa 46’), Bregu, Abazaj, Lamçja (Pergjini 75’). Trajner: Hasan Lika
Flamurtari: Nurkoviç, Liçaj (A.Hoxhaj 54′), Bicaj, Jakovljeviç, Musta, Pollozhani, Sidibe, Useini, Juffo (Hyseni 87′), Alvesh (Kamarra 83’), Bushiç. Trajner: Shpëtim Duro
Karton i verdhë: Aleksi 62’, O.Rapa 64’ / Juffo 7′, Sidibe 53’, Useini 64’, Jakovljeviç 64’, Bicaj 89′
Gjyqtarë: Ardian Beqiri, Gernat Qirici, Ani Koçiaj
