Trajneri i West Hamit, Manuel Pellegrini, ka thënë se trajneri i Liverpoolit, Jurgen Klopp, është mësuar të fitojë me gola të shënuar nga pozicion jashtë loje, pasi që skuadra e këtij të fundit e shënoi një gol të tillë në ndeshjen e mbrëmshme mes këtyre dy klubeve.
Ndeshja mes Liverpoolit dhe West Ham United, e cila u zhvillua të hënën në mbrëmje, përfundoi me rezultat 1:1. Skuadra e Klopp humbi dy pikë të rëndësishme, pasi tani Manchester City është vetëm 3 pikë më pak se ata në tabelën e klasifikimit.
Fillimisht, Liverpooli kaloi në avantazh me golin të shënuar nga Sadio Mane. Gjatë aksionit që u shënua goli, James Milner ishte në pozicion jashtë loje, por gjyqtari e lejoi vazhdimin e lojës dhe Milneri asistoi golin e Manes.
Megjithatë, ky gol i shënuar nga pozicion jashtë loje nuk arriti t’ia sigurojë Liverpoolit tri pikë, pasi Michail Antonio arriti ta barazojë rezultatin vetëm 6 minuta më pas.
Në fundin e ndeshjes, Divock Origi u lejua ta vazhdonte një aksion edhe pse ishte në pozicion jashtë loje. Megjithatë, Liverpool nuk përfitoi këtë herë pasi që Origi nuk shënoi.
Dy trajnerët patën një përplasje në fund të ndeshjes, Pellegrini e bëri të qartë se ai nuk e ka harruar ende takimin e tyre, para gjashtë vjetëve.
Dortmundi i Kloppit mposhti Malagan e Pellegrinit me rezultat 3:2 në çerekfinalet e Ligës së Kampionëve të vitit 2013. Dortmundi e fitoi ndeshjen pas dy golave të shënuar në kohën shtesë. Për golin e fitores, katër lojtarë të ekipit gjerman ishin në pozitë jashtë loje.
“Klopp është mësuar të fitojë me gola të shënuara nga pozicion jashtë loje. Ai më mposhti mua me një gol shtatë metra në pozitë jashtë loje, kur isha në Malaga, kështu që ai nuk mund të ankohet për asgjë”, ka thënë Pellegrini, ish-trajner i Manchester Cityt.
“Ata e shënuan një gol nga pozita jashtë loje. Në minutën e fundit ndodhi përsëri e njëjta, Origi ishte afër gjyqtarit dhe ishte një metër pozicion jashtë loje. Unë kam thënë se duhet ta fitojmë këtë ndeshje për tifozët tanë, por edhe për Manchester Cityn.
Unë desha ta ndihmojë Manchester Cityn, pasi që edhe ata janë klubi im. Ndoshta, kjo është arsyeja pse nuk i pëlqeu kjo gjë trajnerit të Liverpoolit”.
