Manchester United hakmerret ndaj Huddersfieldit, duke e mposhtur me rezultatin e pastër 2-0. Në ndeshjen e fazës së parë United pësoi humbje ndaj tyre dhe që në atë moment humbi shpresat për të arritur Manchester Cityn. Lukaku hapi siparin e golave në fillim të pjesës së dytë, ndërsa më pas lojtari më i paguar në Premier League dyfishon rezultatin. Sanchez fillimisht gabon nga pika e bardhë e penalltisë, por topi rikthehet sërish tek ai dhe e dërgon në rrjetë, duke shënuar edhe golin e parë me fanellën e djajve. Me këtë fitore, United ngushton në 13 pikë distancën nga City, që gjithsesi është shumë e madhe, pasi kanë mbetur vetëm 12 javë deri në fund të sezonit.
Swansea, pasi mposhti me radhë Liverpoolin dhe Arsenalin, arriti të marrë edhe një barazim të rëndësishëm në transfertën ndaj Leicesterit, me rezultatin 1-1. Goli i Xherdan Shaqirit që në minutën e 5-të nuk i shërbeu Stokes, që të marrë të paktën një pikë në transfertën ndaj Bournemouthit, pasi vendasit përmbysën gjithçka në pjesën e dytë, duke fiksuar rezultatin final 2-1.
Në takimet e tjera, Brighton mposhti West Hamin me rezultatin 3-1, ndërsa Southamptoni triumfoi në transfertën ndaj West Bromit me rezultatin 2-3.
