Futbollisti me origjinë shqiptare, Xherdan Shaqiri ka zbuluar nëse ka plan të largohet nga Liverpool.
Shaqiri ka konfirmuar qëndrimin e tij në skuadrën angleze, edhe pse shprehet se duhet të kënaqet me rolin e zëvendësuesit, duke qenë se pozicionin e tij të preferuar e ka zënë Salah. Për këtë fakt, Shaqiri u shpreh se e dinte paraprakisht që nuk do ta kishte aspak të lehtë të siguronte një vend në formacionin titullar të “Të Kuqve”.
“Trajneri ka shumë opsione dhe duhet të vendosë se kush do të luajë. E dija se do të ishte shumë e vështirë para se të transferohesha. Kam një kontratë të gjatë dhe kam ndërmend të qëndroj”, deklaroi futbollisti.
Pavarësisht aktivizimit jo të lartë, Xherdani ka dhënë kontributin e tij në sezonin e suksesshëm të skuadrës së tij. Ai ka realizuar 6 gola dhe ka dhënë 5 asiste në këtë sezon. Një nga këto asiste ka ardhur në fitoren e arritur kundër Barcelonës, me Wijnaldum.
Sa i përket aktivizimit të tij në Champions kundër Barcelonës, Shaqiri tha se: “Ka qenë një moment special për mua të fitoj një tjetër medalje të artë. Jam krenar dhe i lumtur. Mendoj se kam dhënë kontributin tim në fitoren e trofeut.”
