Bashkim Fino, kandidat për të marrë kreun e FSHF-së, i ftuar në emisionin “Fair-play” ka folur për skandalet që kanë ndodhur në Federatë nën drejtimin e Armand Dukës dhe për platformën e tij për 4 vitet e ardhshme.
Jam shumë i qetë. Mosdhënia e listës së delegatëve ka një ndikim mjaft negativ, pasi janë ata që do të na votojnë. Është e drejta e çdo klubi, apo kandidati që ta ketë atë listë, kemi respektuar çdo afat kohorë që ka dhënë FSHF, pos pas këtij afati nuk kemi marrë asnjë listë në dorë. Na dhanë një përgjigje arrogante dhe kjo është një negativitet pasi pengon zhvillimin e kësaj fushate që kemi ne. Na pengon tu qartësojmë platformën tek anëtarët e Asamblesë dhe nuk na jep mundësinë tu kërkojmë votën atyre. Duka ka përdorur autoritetin e tij për të penguar të ketë transparencë në këto zgjedhje.
E dëmton besueshmërinë e zgjedhjeve?
Natyrisht që po, sepse nuk futemi në garë në kushte të barabarta. Ne duhet të jemi në të njëjtat standarde, përderisa jemi në një garë. Gara po prishet dhe kjo jo për hallin tim apo të kandidatit Hala, por për frikë të Dukës.
Shoqatat fantazmë?
Është një parregullsi mjaft e qartë dhe këto shoqata nuk janë të regjistruara askund. Pasi ka disa kritere që duhet të plotësojnë, gjë që nuk e kanë. Është një procedurë e qartë në rregullore që duhen kaluar disa etapa dhe këtyre u mungojnë edhe elementet më bazë, nuk janë të regjistruara në gjykatë apo të ketë numër NIPTI. Këto mund të quhen organizata kriminale, pasi kur nuk janë të regjistruara dhe marrin pjesë në votim quhet krim.
Kur u futa në garë mendoja se Federata është një institucion i pastër dhe që funksionon më së miri. Por në këto ditë që kamë qenë pranë saj kamë vënë re një numër skandalesh të mëdhenj. Duke filluar me këto shoqata dhe më lëvizjen që u bë pas denoncimit që i bëra. Ata iu drejtuan gjykatës për tu regjistruar, u vërtetua që nuk ishin të rregullta, kjo është katastrofë. Edhe ato që arritën të regjistrohen në datë 15 kur ishte afati fundit, nuk do të marrin pjesë në zgjedhje. Kam dijeni që janë regjistruar vetëm dy nga 12 shoqata, por ato duhet të plotësojnë një dokumentacion të caktuar që të marrin pjesë në zgjedhje.
