Skënderbeu rimbush arkën e klubit pas një viti pezullim nga Kupat e Europës. Skuadra e korçarëve siguroi dje një shumë prej 675 mijë euro me kualifikimin ndaj Kairat.
Korçarët kanë arkëtuar në fillim të turit nga UEFA 215 mijë euro por kualifikimi ndaj ekipit Sant Hulia u shtoi bardhekuqve edhe 225 mijë euro.
UEFA parashikon një premio prej 235 mijë eurosh për kualifikimin në turin e tretë dhe shpërblimi në total shkon 675 mijë euro. Ky është vetëm përfitimi nga UEFA, por nuk janë llogaritur akoma shumat nga e drejta televizive, biletat apo reklamat.
“Sigurisht që do të ketë premio në rast se ekipi kalon në turin tjetër. Në fakt, unë ua kam bërë të ditur edhe lojtarëve, do të jap 50 mijë euro shpërblim nëse do të kualifikohen pas përballjes së kthimit me Kairatin”, tha Takaj disa ditë përpara ndeshjes duke ditur si t’i motivojë lojtarët e tij në prag të ndeshjeve të tilla delikate dhe, për më tepër, në Europë.
Si rrjedhim, lojtarët dhe pjesëtarët e stafit siguruan një shumë prej 50 mijë eurosh që ishte vendosur premio për ta në rast kualifikimi ndaj skuadrës kazake.
