Pas sfidës mes Gjermanisë e Holandës, që përfundoi 2-2, është qartësuar përfundimisht kuadri në Ligën A, prej ku 4 kombëtaret fituese të çdo grupi do të përballen në qershor 2019, për të luajtur finalet e turneut. Portugalia pritëse, Anglia, Zvicra dhe Holanda do të përballen për trofeun.
FORMATI – Katër kombëtaret që fituan 4 grupet e Ligës A do të përballen me sistem eliminimi në Portugali qershorin e ardhshëm. Fituesit e gjysmëfinaleve do të ndeshen në finalen e madhe. Shorti do të hidhet në Dublin, më 3 dhjetor.
- 5 qershor: Gjysmëfinalja 1
- 6 qershor: Gjysmëfinalja 2
- 9 qershor: Play-off për vendin e tretë
- 9 qershor: Finalja
KU DO TË LUHET – Tre vende, Italia, Polonia dhe Portugalia, shfaqën interesim për të pritur fazën finale të Nations League. Duke qenë të gjitha në grupin 3, fituesi i atij grupi do të organizonte fazën finale. Portugalia ka propozuar Estádio do Dragão në Porto dhe Estádio D. Afonso Henriques në Guimaraes si stadiumet e finaleve.
PËRFITIMET – Së pari, kombëtarja fituese do të marrë trofeun prej argjendi, 71 centimetra i lartë. Për sa i përket anës financiare, fitimet do të shpërndahen në këtë mënyrë:
- €7.5m FITUESI
- €6.5m FINALISTI HUMBËS
- €5.5m VENDI I TRETË
- €4.5m VENDI I KATËRT
