Ndonëse ishte në listën e ngushtë prej 15 filmash, “Zgjoi” i regjisores kosovare, Blerta Basholli, nuk arriti të nominohet për çmimin “Oscar”, në kategorinë e filmit më të mirë ndërkombëtar.
Ky film ka bërë histori, pasi më herët ka rrëmbyer tre çmimet më të rëndësishme të festivalit më të madh të pavarur të filmit “Sundance”, në SHBA. Bëhet fjalë për “filmin më të mirë”, për “regjisoren më të mirë” dhe “çmimi i publikut”.
“Zgjoi” frymëzohet nga historia e vërtetë e Fahrije Hotit nga Krusha e Madhe, e cila në kërkim të burrit të saj të humbur gjatë luftës në Kosovë, nis një biznes bujqësor për të siguruar mbijetesën e familjes.
Ajo e fillon këtë angazhim në një ambient tradicionalisht patriarkal, ku ambicia e femrave për t’u zhvilluar nuk shihet me sy të mirë. Gjithsesi, askush dhe asgjë nuk e ndaloi Fahrijen në misionin e saj.
