Autoritetet e Filipineve kanë vrarë 32 persona gjatë natës së djeshme në “luftën ndaj drogës”, duke shënuar kështu numrin më të larë të vdekjeve në një natë, që prej fillimit të luftës ndaj narkotikëve të shpallura prej presidentit Duterte në vitin 2016.
Policia vendase kanë bërë të ditur se aksioni u zhvillua në provincën e Bulacan, në veri të kryeqytetit të vendit.
Sipas tyre, të gjithë personat e vrarë ishin shpërndarës droge dhe gjithashtu në momentin e zhvillimit të aksionit ishin të armatosur.
Me mijëra persona janë vrarë që prej nisjes së këtij aksioni kombëtar në Filipine, i cili është kundërshtuar fuqishëm nga organizatat ndërkombëtare.
“Lufta ndaj drogës” sipas presidentit Duterte ka si qëllim zhdukjen e këtij problemi, madje më herët ai kishte deklaruar se çdo qytetar mund të vriste një shpërndarës droge.
Gjatë aksionit të natës së mbrëmshme, përveç 32 personave që mbetën të vrarë, qindra të tjerë janë arrestuar.
Që nga momenti që Duterte u bë president, shifrat e qeverisë tregojnë se policia ka vrarë 3,451 “personalitete të drogës”.
Më shumë se 2,000 njerëz të tjerë janë vrarë në krime të lidhura me drogën dhe mijëra të tjerë janë vrarë në rrethana të pashpjegueshme, sipas të dhënave të policisë.
Duterte ka pranuar se policia ishte “e korruptuar në thelb”, por u zotua të mbrojë oficerët që vrasin të dyshuarit e drogës nën rrethana të dyshimta.
