Dje ka nisur edicioni i 13-të i Festivalit Ndërkombëtar të Filmit të Animuar “AniFestROZAFA2022”, organizuar nga shtëpia kinematografike “Projekt SXHJ”. Ky festival synon të bëjë bashkë regjisorë e kineastë nga e gjithë bota, të cilët do të shfaqin filmat por edhe do të mund të vendosin lidhje të reja për zhvillimin e projekteve të tyre të ardhshme. Gjithashtu kineastët do të mund të vizitojnë qytetet e Gjirokastrës dhe Shkodrës, gjatë ditëve të festivalit. Në Gjirokastër do të prezantohen filmat pjesëmarrës, ndërsa në qytetin e Shkodrës do të ndahen çmimet për fituesit.
Festivali në fjalë është financuar nga Qendra Kombëtare e Kinematografisë. Drejtori i festivalit Artan Maku shprehet se në zyrën e festivalit këtë vit mbërritën 508 filma nga 58 shtete, me shtrirje në katër kontinente.
“Nga grupi i specialistëve janë selektuar 49 filma të shkurtër, nga 30 shtete, filma artistik vizatimor, ku 2 filma janë prodhime shqiptare. Për vlerësimin e filmave janë ngritur dy juri. Juria e fëmijëve në bashkëpunim me QKF. Juria ndërkombëtare në bashkëpunim me ECFA org. shoqatën europiane të filmit për fëmijë”, ka deklaruar Maku.
“Festivali “AniFest 2022”, tashmë është aktivitet që ka krijuar një traditë të bukur në qytetin e Gjirokastrës. Është unik në llojin e tij në territorin e Shqipërisë. Aktiviteti është i certifikuar dhe i njohur nga zyra e të drejtës së autorit dhe akredituar nga ECFA (shoqata europiane e filmit për fëmijë), e cila e monitoron në çdo moment hap pas hapi përmes z. Felix Vanginderhuysen General Secretary i ECFA. Festivali ndërkombëtar i filmit për fëmijë “AniFest A ‘Gjiro” do të zhvillohet në tetor në datat 10, 11, 12 dhe 13 tetor në Gjirokastër”, thotë drejtori Maku.
