Drejtoria e ALUIZNI-t Elbasan ka legalizuar 10 kisha. Mesditën e sotme, drejtori i ALUIZNI-t, Mariglen Disha, së bashku me deputetin e zonës, Taulant Balla, kanë organizuar një vizitë në Kishën e Shën Kollit të ndërtuara në mënyrë informale në Elbasan, edhe pse mbi rrënojat e kishës së vjetër.
Kjo “dhuratë” e ALUIZNI-t vjen në prag të festës së Pashkëve, për të gjithë besimtarët e fesë ortodokse. Taulant Balla vlerësoi se objektet e legalizuara fetare shërbejnë edhe si kopshte për fëmijët e zonave ku ndodhen. “Kisha që shikoni jo vetëm që është një objekt i besimit, por gjatë ditës mirëpret fëmijët si një kopësht, ku ata marrin dijet e para për jetën. Ne kemi shumë për të mësuar nga qetësia nga virtyti dhe çdo mesazh tjetër që jep kisha autoqefale shqiptare”, tha Balla.
Mitropoliti i Elbasanit, pasi vlerësoi punën e ALUIZNI-t, shtoi se legalizimi i kishave është bërë edhe në kuadrin e një institucionalizimi të mirë të objekteve të kultit.
Në Elbasan, kishat ortodokse janë ngritur, kryesisht, mbi rrënojat e kishave të vjetra të shembura nga regjimi komunist, rreth 40 vjet më parë.
