Ferguson: Mbroje titullin, ose dorëzoje atë/ Trajneri McGregor-it: Ai kërkon triologjinë të parën

Pasi mposhti me “submission” në raundin e tretë Kevin Lee, në duelin e vlefshëm për titullin e përkohshëm të peshës së lehtë, zhvilluar sot në UFC-216, sportisti amerikan i arteve marciale mikse Tony Ferguson ka deklaruar se tani synon një përballje me Conor McGregor. Madje Ferguson ka përdorur një ton të ashpër karshi irlandezit, duke e ftuar atë në një duel për titull në kafaz. “Do të të shqep në dru. Është më mirë për ty të vish dhe të mbrosh atë titull. Mbroje titullin, ose dorëzojë atë”, ka qenë deklarata e Ferguson, që korri fitoren e 23-të në UFC, ku ka vetëm 3 humbje.

Mediat amerikane bëjnë me dije se është logjike një përballje mes Ferguson dhe McGregor, që pas duelit me Mayweather duhet të rikthehet në kafaz për të mbrojtur titullin kampion. McGregor nuk duelon në artet marciale mikse që në nëntor të vitit të kaluar, kur fitoi titullin kampion të peshës së lehtë ndaj Eddie Alvarez dhe më pas kërkoi disa muaj pushim, pasi bashkëshortja ishte shtatzënë. Pavarësisht kësaj “The Notorius” ende nuk ka deklaruar se çfarë do të bëjë në të ardhmen, por ai ka pranuar se përballja me Ferguson është një nga opsionet e mundshme në të ardhmen.

Edhe pse presidenti i UFC-së, Dana White, deklaroi se sfida e radhës e Conor McGregor do të jetë në kafaz ndaj kampionit të përkohshëm Tony Ferguson, një nga njerëzit më të ngushtë të kampionit irlandez, Owen Roddy, tha se e ardhmja mund të rezervojë surpriza. Madje ai deklaroi se fansat i kërkojnë McGregor që fillimisht të përballet me Nate Diaz dhe më pas me Tony Ferguson. “Në fakt, janë dy opsione të mundshme që na intrigojnë, por Conor preferon sfidën e tretë me Diaz”, u shpreh Roddy, një nga anëtarët të stafit drejtues të irlandezit.

“Unë e kuptoj që sfida mes McGregor dhe Ferguson ka më shumë sens, pasi njëri është kampion bote dhe tjetri kampion i përkohshëm dhe për UFC-në është e rëndësishme kjo përballje. Por njerëzit duan diçka tjetër, përballjen e tretë të madhe mes Conor dhe Diaz. Kjo, pasi është më tërheqëse si sfidë, janë dy rivalë të fortë dhe që kanë treguar se janë më të mirët dhe, mbi të gjitha, fansat e duan këtë përballje. Gjithsesi, në fund do të jetë Conor ai që do të vendosë”, i shpreh trajneri i kampionit irlandez të arteve marciale mikse, Owen Roddy.