Zgjedhësit e Kosovës kanë shprehur pakënaqësinë e tyre për forcat politike konkurruese në garën zgjedhore të para një jave, nëpërmjet një forme proteste që përcjell mesazh të fortë për politikën atje.
Një numër rekord fletë-votimesh, plot 52.500 të tilla, janë shpallur të pavlefshme nga ky proces zgjedhor.
Një shifër kaq e lartë e votës së pavlefshme padyshim që ka edhe ndikimin e saj në rezultatet e zgjedhjeve në Kosovë, pasi do të prodhonte 7 mandate plus në Kuvend.
Mediet në Kosovë po e cilësojnë fenomenin, si vota e revoltës.
Kjo nuk ka qenë forma e vetme e revoltës, e shprehur zgjedhësve. Nëpërmjet disa mesazheve që i kanë përçuar ditën e zgjedhjeve, kanë treguar frustrim edhe ndaj gjithë faktorit politik, të demonstruar nëpërmjet bojkotit dhe prishjes së votës, shkruan Koha Ditore.
Pjesëmarrja në zgjedhje ka qenë vetëm 40%, më e ulëta që prej pasluftës.
Përveç kësaj, zgjedhjet janë vlerësuar si më të rregulltat që janë organizuar ndonjëherë në Kosovë. Ato nuk janë kontestuar nga asnjë subjekt politik.
