Ministri i Financave dhe Ekonomisë, Arben Ahmetaj ka zhvilluar një takim me përfaqësues të administratës Tatimore, Doganore dhe Inspektoratit të Punës.
Gjatë fjalës së tij, Ahmetaj theksoi se faza e tretë e aksionit ndaj informalitetit nuk do të jetë për të rritur të ardhurat në buxhetin e shtetit, por do të ketë në fokus korsinë e komunikimit dhe të edukimit të tatimpaguesit:
“Aksioni anti-informalitet, nuk është një aksion për të mbledhur para për buxhetin e shtetit, sepse mbledhja e taksave dhe të ardhurave ka në themel parimin e vetë-deklarimit dhe vullnetarizmit.
Është detyrë e administratës fiskale, e Drejtorisë së Përgjithshme të Tatimeve, e Drejtorisë së Përgjithshme të Doganave dhe Inspektoritatit të Punës, që të reflektojnë në terren një zbatueshmëri shumë këmbëngulëse të ligjit dhe një modesti maksimale në përqasje me qytetarët dhe sipërmarrjen, për të reflektuar filozofinë e një qeverie të tërë, që administrata do duhet të jetë në shërbim të qytetarëve dhe në shërbim të sipërmarrjes. Ju garantoj që nuk do të tolerohet asnjë sjellje e padenjë, e jashtëligjshme, arrogante, e administratës tatimore, doganore apo inspektoratit kundrejt tatimpaguesve. Kjo është taksative”,tha Ahmetaj.
Aksioni ndaj informalitetit në dy fazat e para u fokusua në formalizimin e biznesit të vogël dhe të të punësuarve, si dhe në lëshimin e kuponit tatimor, ndërsa faza e tretë do fokusohet kryesisht te kontrolli i biznesit të madh dhe kryesisht mbi analizën e riskut.
