Në kuadër të shtimit të hapësirave të gjelbra, Bashkia e Tiranës me ndihmën e Komunitetit Mysliman mbolli rreth 100 pemë të reja në parkun e Farkës.
Kryetari i Bashkisë së Tiranës, Erion Veliaj, i shoqëruar edhe nga kreu i Myftinisë së Tiranës, Ylli Gurra, theksoi se simbolika e mbjelljes së pemëve është një apel për të gjithë, ku gjithsecili duhet të kultivojë paqen dhe jo grindjen.
“Dy mundësi kemi; o të mbjellim paqe, pemë, dashuri dhe shpresë, ose të mbjellim sherr e grindje mes njëri-tjetrit. Unë besoj se qoftë edhe me simbolikën e 100 pemëve që Komuniteti Mysliman na jep sot, vjen edhe një mesazh fantastik në kontekstin e gjërave që po ndodhin. Më mirë me mbjellë një pemë, duke krijuar një vend pushimi dhe paqeje për komunitetin e Farkës, se sa me mbjellë sherr e shamatë, të cilat nuk sjellin asnjë dobi për vendin tonë”, tha Veliaj.
Kryebashkiaku shprehu besimin se nisma e Komunitetit Mysliman do të ndiqet edhe nga komunitetet e tjera për krijimin e hapësirave të reja.
“Mezi pres që kësaj nisme t’i bashkohen komunitetet të tjera. Do të vazhdojmë edhe pak javë, derisa të na lejojë stina e mbjelljeve. Do ta promovojmë gjithnjë e më shumë liqenin e Farkës, jo vetëm për bukurinë, por edhe për çështje ekonomike. Një njeri që vjen e shpenzon, blen diçka, paratë ngelen në komunitet dhe kjo është ajo që themi ekonomia solidare ku secili kontribuon te mirëqenia e fqinjit apo të afërmit të vet”, tha Veliaj.
Më pas, kryebashkiaku i Tiranës mori pjesë edhe në mbjelljen e pemëve të reja në zonën e Kasharit, ku dhjetëra biznese iu bashkuan nismës së Bashkisë së Tiranës, duke dhuruar fidanë të rinj.
