Familjet në nevojë do duhet të presin Shtatorin për të qenë përfitues të ndihmës ekonomike.
Ministria e Mirëqenies Sociale ka nxjerrë dy udhëzime më 8 Maj, të cilat shfuqizojnë udhëzimet e Shkurtit 2017, ku parashikohej rritje e ndihmës ekonomike nga 15 Maji 2017.
Udhëzimet e reja të botuara në fletoren zyrtare e shtyjnë afatin më 1 Shtator të këtij viti. Konkretisht bëhet fjalë për udhëzimin “për përdorimin e fondit të kushtëzuar për bllok-ndihmën ekonomike deri në 6 për qind”, i cili i jep të drejtën Këshillit Bashkiak të miratojë dhënien e ndihmës ekonomike për familjet që nuk janë përfituese nga sistemi i pikëzimit, duke përdorur deri në 6 për qind të fondit të kushtëzuar për bllok ndihmën ekonomike.
Nga ky vendim përfitonin 51 mijë persona nga 13 kategori sociale me trajtim shtetëror.
Ndërsa udhëzimi i dytë shfuqizon pikën15 e udhëzimit nr. 4, datë 17.2.2017 “Për përllogaritjen e përfitimit të ndihmës ekonomike”.
Kështu llogaritja e re e ndihmës ekonomike për rreth 100 mijë familje, ku është hequr ndihma e pjesshme prej 800 lekësh, nuk do të nisë nga ky muaj, por familjet në nevojë do duhet të presin Shtatorin për të qenë përfitues.
Nga Ministria e Mirëqenies nuk janë dhënë sqarime se përse janë marrë këto vendime, por gjithçka duket se do të rëndojë tek familjet në nevojë, të cilët duhet të presin mbi tre muaj për përfitimet e reja.
