Familja Mlloja nga Shqipëria, qëndroi për më shumë se një vit në një dhomë hoteli në Concarneau të Francës por tashmë duhet të largohet nga territori francez. Mediat franceze shkruajnë se shërbimi social ka njoftuar se nuk do të paguajë më për shpenzimet e familjes. ”Nuk ka logjikë, kjo familja mund të dekurajohet për të ardhmen e saj”, tha Marina Rakoçeviç, një nga mbështetëse e familjes.
Djali i tyre i madh, Elsi, 4-vjeç është regjistruar në kopsht në qendër të qytetit, ku ai është integruar mirë, pavarësisht se në fillim e kishte pasur të vështirë të fliste frëngjisht. Ndërsa djali i vogël i familjes ka pasur probleme shëndetësore dhe rregullisht ai shkon në qendrat spitalore ku merr shërbimin e duhur. Çifti Mlloja në qershor kishte paraqitur një kërkesë për leje qëndrimi në prefekturë, për shkak të gjendjes shëndetësore të djalit të tyre.
Prindërit asnjëherë nuk kishin marrë përgjigje për kërkesën e paraqitur në prefekturë. Familja që nga fillimi i vitit 2017 qëndron në Francë. Ajo kishte udhëtuar në Itali më pas në Gjermani përpara se të kërkonte azil në Francë. Kërkesa për azil nga ana e shtetit francez i është refuzuar. Por akoma nuk dihet nëse familja do të dëbohet apo do lejohet të qëndrojë.
