Nga Klaudia Malaj/Mëngjesi për ta nis në orën 06:30. Kjo është e përditshme dhe ata nuk kanë alarm jo, janë hapat e shpejtë të kalimtarëve të cilët nxitojnë për në punë.
Kjo është “zilja” që mbase atyre nuk u pëlqen, por deri më sot nuk kanë pasur mundësi ta ndërrojnë. Ai mermer i vdekur, pikërisht përballë Bankës së Shqipërisë, i mbron nga shiu, nga dielli, nga i ftohti dhe nga vapa. Ka kohë që është strehëza e tyre.
Kjo familje e mbetur në mëshirë të fatit rreket të mbledh sa më shpejtë plaçkat dhe të nisin “punën” si çdo mëngjes.
Puna e tyre është shumë fisnike dhe nuk u bien në qafë askujt, shohin kazanët e plehrave më të afërta.
Dhe aty ka konkurrencë, por atyre nuk u pëlqen të grinden me askënd. Preferojnë një kafshatë buke të thatë edhe të ftohtë. Edhe pse duan të jetojnë, ata ende nuk po ja dalin dot të mbijetojnë.
Ata nuk njohin asnjë ditë pushimi, madje as gjumin e drekës jo. Më ndodh t’i shoh çdo mëngjes kur vete për në punë. Madje mund të them me plotë gojën se i njoh shumë mirë. Ata janë “tre muskutierët” që i bëjnë ballë jetesës në rrugë.
Një nënë e moshuar me dy djemtë e saj. Njëri prej tyre (ai me batanije portokalli) është i sëmurë nga shëndeti mendor. Kurse djali tjetër është ende në gjumë, përkrahë nënës së tij.
Dy më të shëndetshmit munden të “mbajnë” familjen në këmbë. Askush nuk do ta donte fatin e kësaj familjeje. Askush nuk do të donte që kjo histori e trishtë të përsëritet.
Shifrat e mirëqenies dhe rritja ekonomike për Shqipërinë sipas Fondit Monetar Ndërkombëtar është: “Rritja ekonomike për vitin 2018 do të jetë 3.7%. Të dhënat janë bërë të ditura nga Fondi Monetar Ndërkombëtar, në raportin e Pasqyrës Ekonomike Globale të prillit, ku mësohet pritshmëria për rritjen ekonomike të Shqipërisë në vitin 2018. Më herët, në raportin e tetorit të vitit të kaluar, FMN e kishte ulur pritshmërinë për performancën e Shqipërisë me 0.2 pikë përqindje në 3.7%, shifër që e mbajti të pandryshuar dhe në rishikimin e prillit. Ndërkohë, FMN ka rritur vlerësimin për rritjen e vendit në 2017-ën, nga 3.7% në 3.9%, në krahasim me raportin e tetorit, në linjë dhe me të dhënat e fundit të INSTAT, që vlerësoi se ekonomia vendëse u zgjerua me 3.84% në vitin 2017.”
Nëse do të lexojmë se çfarë thonë dokumentet të ballafaquara me “pasqyrën e thyer” të realitetit shqiptar vëmë re se fjalët inkurajuese dhe pozitive ekzistojnë, por faktet flasin ndryshe.
Edhe nëse në media do të paraqiten sërish fakte të tilla, ne gazetarët nuk kemi asgjë në dorë, thjeshtë të denoncojmë faktet dhe të qëndrojmë larg përlyerjeve politike. Ata të cilët duhet të merren me këtë çështje janë liderët të cilët janë votëbesuar edhe për një mandat të dytë.
Ndryshimi nis nga rrënja dhe gjërat e vogla!
TIRANA TODAY
