Gjykata e Tiranës ka pranuar kërkesën e Prokurorisë për të hetuar ish-kryebashkiakun e Kavajës, Elvis Roshi. Në seancën e zhvilluar sot, Gjykata ka vlerësuar të drejtë hetimin e prokurorisë, dhe tashmë dosja e tij ka shkuar në gjyq. Elvis Roshi nuk ishte i pranishëm gjatë seancës, por u përfaqësua nga avokati mbrojtës.
Ai akuzohet për falsifikim të dokumenteve, akuzë e cila ka të bëjë me formularin e dekriminalizimit, ku Roshi kishte shënuar se nuk kishte patur precedentë të mëparshëm penal. Nga verifikimi i prokurorisë rezultoi se kishte patur disa masa sigurimi, ndalime dhe dëbime në Itali, Zvicër dhe Gjermani.
Përveç mungesave të palëve në proces dhe problemet me njoftimin, një tjetër shkak për zvarritjen e këtij procesi paraprak ishte dilema se kush gjykatë ishte kompetente për të gjykuar Roshin, ajo e Kavajës apo Gjykata e Tiranës.
