Cmimi i Madh i Kinës dominohet nga Ferrari. Është Sebastian Vettel që ka siguruar sërish “pole position” në Shangai me kohën më të shpejtë në pistë, 1’31”095. Ndërsa pas gjermanit është vendosur shoku i tij i skuadrës Raikkonen, duke përsëritur atë që ndodhi një javë më parë në Bahrein ku dominoi “kokëkuqja”.
Pilotët e makinës gjermane, Mercedes u renditën në vendet 3-4, me Bottas që sërish ishte më i shpejtë se shoku i skuadrës Lewis Hamilton. Më pas, u klasifikuan dy pilotët e Red Bull, ku Max Verstappen la pas shokun e skuadrës Daniel Ricciardo, duke e nisur garën nga vija e tretë. Në “top 10” u renditën edhe Hulkenberg, Perez, Sainz e Grossjean.
Në përfundim të sesionit të parë të provave zyrtare u eliminuan pilotët Sirotkin, Gassley, Stroll, Leclerc e Ericsson, ndërsa në përfundim të sesionit të dytë u eliminuan Magnussen, Ocon, Alonso, Vandoorne e Hartley.
“Jam i kënaqur për këtë rezultat, bëra një xhiro të përkryer. Makina ishte e mrekullueshme, e shpejtë dhe e pakapshme, duke u përmirësuar nga gara në garë. Bëra edhe disa gabime, por kuptova se ku duhet të përmirësohesha dhe ia dola mbanë”, u shpreh piloti gjerman i “kokëkuqes”.
Piloti gjerman ia dedikon skuadrës këtë rezultat, që i dha mundësi të ketë një makinë të shpejtë në pistë, duke lënë pas rivalët e Mercedes. “Gomat ishin shumë të ndjeshme, por arrita të bëj një paraqitje të mirë në të tri sektorët e pistës. Ndaj kjo është meritë e skuadrës, që përgatiti një makinë të balancuar mirë. Nuk e prisja që të ishim kaq të fortë, madje edhe kaq superior ndaj Mercedes. Shpresoj që nesër gara të jetë po kaq e mirë, pasi kemi realizuar vetëm gjysmën e punës deri më tani”, tha Vettel. Gara nesër në pistën e Shangait do të nisë në orën 8:10 të mëngjesit me orën shqiptare.
