Eurovizioni ka njoftuar ndryshime të mëdha në procesin e votimit në konkursin e vitit të ardhshëm. Juritë profesionale janë hequr nga gjysmëfinalet, që do të thotë se shikuesit vetëm do të zgjedhin se kush kualifikohet për finalen e madhe.
Vendet që nuk konkurrojnë në garë do të lejohen gjithashtu të votojnë për herë të parë. Lëvizja vjen pasi u zbulua se gjashtë juri shkëmbyen vota në konkursin e këtij viti në Torino, Itali. Modele të parregullta votimi u zbuluan nga Azerbajxhani, Gjeorgjia, Mali i Zi, Polonia, Rumania dhe San Marino, tha EBU, e cila organizon konkursin.
Këto vota të jurisë u zbritën dhe u zëvendësuan me një rezultat të përgjithshëm, të llogaritur nga rezultatet e vendeve të tjera me të dhëna të ngjashme votimi.
Në fund, konkursi u fitua nga Kalush Orkestra e Ukrainës, me Sam Ryder të Mbretërisë së Bashkuar që zuri vendin e dytë.
Juritë profesionale, të cilat përbëhen nga kompozitorë profesionistë dhe figura të industrisë muzikore, kanë ekzistuar të paktën që nga konkursi i dytë i këngës në Eurovizion në 1957 (sistemi i votimit për konkursin e parë nuk është zbuluar kurrë).
Sipas sistemit aktual, rezultatet e tyre kombinohen me rezultatet e një votimi publik për të përcaktuar fituesin e përgjithshëm. Kjo praktikë do të vazhdojë edhe në finale, thuhet në njoftimin e EBU-së.
Lejimi i vendeve jo-pjesëmarrëse për të votuar, do të pasqyrojë “ndikimin global të ngjarjes”, tha Martin Österdahl, mbikëqyrësi ekzekutiv i konkursit.
“Të gjithë ata që ndjekin shfaqjen, kudo që jetojnë në botë, mund të japin votën për këngët e tyre të preferuara”.
Votat online nga “pjesa tjetër e botës” do të shtohen së bashku, dhe do të konvertohen në pikë që do të kenë të njëjtën peshë si një vend pjesëmarrës në të dyja gjysmëfinalet dhe finalen e madhe, tha EBU.
Publiku shpesh ka shije të ndryshme nga juritë. Këtë vit, Ukraina fitoi me shumicë dërrmuese televotimin në finale, duke shënuar 439 pikë, por doli e katërta në votimin e jurisë, me 192 pikë.
Tridhjetë e shtatë vende do të marrin pjesë në konkursin e vitit të ardhshëm, ku Mali i Zi dhe Maqedonia e Veriut tërhiqen për shkak të kostos së pjesëmarrjes.
Rusia u përjashtua nga ngjarja e këtij viti pas pushtimit të Ukrainës. Pritet që vendi gjithashtu të përjashtohet në vitin 2023.
Burimi i lajmit: BBC. Përshtatur nga Tirana Today
