Pushimet nuk konsiderohen luks vetëm për shqiptarët, por edhe për një pjesë të familjeve evropiane. Sipas Institutit Evropian të Statistikave, një në 3 familje evropiane e kanë të pamundur ekonomikisht të përballojnë një javë pushime.
Në anketën e posaçme ku janë publikuar shifrat vërehen diferenca të mëdha mes vendeve.
Sipas Eurostatit, nivelin më të ulët të familjeve që nuk mund të përballojnë pushimet e ka Suedia. Në vendin nordik janë vetëm 8.2 për qind e familjeve, të cilat nuk kanë të ardhura për të shkuar një javë me pushime larg shtëpisë. Më pas vjen Luksemburgu me 13.1 për qind dhe në vendin e tretë renditet Danimarka me 13.7 për qind.
Ndërkohë në shtetet e reja anëtare të Lindjes është një situatë krejt tjetër.
Në Bullgari janë 56.4 për qind e familjeve që nuk kanë të ardhura për një javë pushime larg shtëpisë; në Kroaci 62.8 për qind, ndërsa në Rumani plot 66.6 për qind e popullsisë s’ka parà për pushime.
Sipas Eurostatit, jo të gjithë mund t’i përballojnë pushimet dhe udhëtimet gjatë verës, madje edhe në Bashkimin Evropian.
