Në deklaratën e përbashkët të tre deputetëve të Parlamentit Evropian, Ivo Vajgl, Eduard Kukan dhe Knut Flekenshtajn, pas takimit me homologun maqedonas, Nikolla Poposki, në Strasburg thuhet: “nuk shohim ndonjë arsyetim të cirkut që po përdoret në Parlament për shtyrjen e zgjedhjes së kryetarit të ri të Parlamentit dhe formimit të qeverisë së re”.
“Si anëtarë të Parlamentit Evropian që i ka mbështetur të gjitha përpjekjet për të kapërcyer krizën aktuale dhe të cilët kanë punuar shumë për të mbështetur perspektivën evropiane të qytetarëve maqedonas, ne jemi thellësisht të shqetësuar në lidhje me zgjatjen e pa justifikuar të krizës dhe rritjen e pasojave për vendin, duke përfshirë edhe përkeqësimin e marrëdhëniet ndëretnike. Votimi për raportin e vendit për 2016-ën, tashmë u shty dy herë si rezultat i drejtpërdrejtë i pasigurisë në vend. Ne besojmë fuqishëm se situata në vend mund të përmirësohet nëpërmjet zbatimit të proceseve demokratike, të cilat duhet të çojnë në tejkalimin e krizës politike”, thuhet në deklaratën e tre deputetëve.
