Ashtu siç ishte parashikuar, shqiptari Ermal Meta ka arritur të rrëmbejë çmimin e madh të Sanremos, së bashku me Fabrizio Moro, të cilët u shpallën fitues me këngën ‘Non mi avete fatto niente’.
Finalja e madhe e festivalit u zhvillua në Teatrin Ariston në San Remo, ndërsa mbrëmja gala u drejtua nga Claudio Baglioni, Pierfrancesco Favino dhe Michelle Hunziker.
Ermal Meta dhe Fabrizio Moro triumfuan mes 20 kandidatëve, të cilët konkurruan për çmimin e madh ne edicionin e 68 të Sanremo. Pas raundit të parë të votimeve, në finale u kualifikuan Anna Lisa, Lo Stato Sociale, si dhe Ermal Meta e Fabrizio Moro.
Këta të fundit kaluan momente jo të mira, teksa kënga e tyre u dyshua se ishte e kopjuar, por në fund festivali vendosi që ata të vazhdonin garën.
Fituesi u përcaktua nga një juri speciale e përzier, juria e gazetarëve dhe televotimet. Ermal Meta lindi në Fier dhe që prej moshës 13 vjeçare jeton në Bari me familjen e tij. Tashmë, kënga e tij do përfaqësojë Italinë në Eurovision në Lisbonë të Portugalisë.
Kënga e Ermal Metës dhe Fabrizio Moro ‘Non mi avete fatto niente’ është kënga më e shkarkuar në iTunes dhe kënga më e dëgjuar në Spotify dhe platformat e tjera, ndërsa hashtagu ’#IostconMetaMoro’ është më i klikuari në Twitter këtë javë. Aplikacioni Shazam identifikon Ermal Metën dhe Fabrizio Moro si artistët më të kërkuar të javës dhe agjencitë e basteve kishin vënë kuotat më të ulëta për dy këngëtarët.
