Duket se e ardhmja e Ergys Kaçe tashmë është vendosur. Mesfushori shqiptar është shumë pranë firmës me ekipin e dytë më të suksesshëm në Greqi, Panathinaikosin. Pas disa javësh diskutime mes dy klubeve duket se tashmë është arritur akordi për të shkëmbyer lojtarë mes tyre. PAOK-u këtë sezon nuk e përfshiu shumë në formacion Kaçen dhe kjo bëri që të humbte vendin titullarë si në klub ashtu edhe në kombëtaren shqiptare.
PAOK-u kërkon të afrojë në radhët e tyre qendërmbrojtësin brazilian Rodrigo Moledo, por që të arrijë tek ai do ti duhet të humbë shërbimet e mesfushorit të Kombëtares Shqiptare dhe të paguaj 400 mijë euro. Braziliani pritet që ti bashkohet ekipit të Selanikut gjatë orëve të ardhshme për të hedhur firmat, ndërsa Kaçe do të stërvitet për të fituar një vend titullarë tek ekipi i ri. 25-vjeçari do të ketë një sfidë të vështirë përpara, pasi konkurrenca tek Panathinaikos është shumë e fortë. Një motiv më shumë është që Kaçe kërkon që të jetë sërish në formacionin e Panuccit në Kupën e Konfederatës dhe në eliminatoret e Europianit 2020.
