“Aty ku janë vendet më të zhvilluara në botë, Amerika, Rusia, edhe Turqia do të ngritet drejt kësaj pozite. Do të jemi në 10 vendet e para”, tha presidenti turk, Recep Tayyip Erdogan.
Ai ka thënë se janë ndërmarrë të gjitha masat e sigurisë që zgjedhjet e ditës së nesërme të kalojnë në një atmosferë të qetë dhe të sigurt.
Erdogan iu drejtuar masës në lagjen Beylikduz të Stambollit, dhe me këtë rast iu referua zhvillimeve aktuale. Në fokus të fjalimit të Erdoganit ishin zgjedhjet e nesërme presidenciale dhe parlamentare.
Ai tha se Turqia me ndryshimet kushtetuese ka kaluar në sistemin presidencial. Sipas tij, Turqia në kuadër të këtij sistemi do të fluturojë dhe do të arrijë mbi nivelin e qytetërimeve moderne.
Erdogan po ashtu iu referua edhe politikës së jashtme, duke theksuar se “Turqia në politikën e jashtme nuk është më një vend që dëgjon urdhrat e dikujt, por një vend që është në tryezë dhe në terren”.
Presidenti i Turqisë gjithashtu komentoi edhe pretendimet e kreut të Partisë opozitare Popullore Republikane (CHP) Kemal Kılıçdaroglu dhe kandidatit presidencial Muharrem Ince, në lidhje me sigurinë e zgjedhjeve, .
Ai potencoi se Turqia është shtet i së drejtës, dhe se janë marrë të gjitha masat e sigurisë për zgjedhjet e nesërme, përfshirë edhe rajonet në juglindje të vendit.
“Zotëri Muharrem, zotëri Kemal, dua t’ju them se Turqia para së gjithash është shtet i së drejtës. Në 16 vitet e fundit nuk kemi pasur shkelje në zgjedhje, me përjashtim në rajonet terroriste në juglindje. Në këto rajone këtë vit kemi ndërmarrë të gjitha masat e nevojshme. Në rast se terroristët kërcënojnë procesin zgjedhor, do t’u hipim në qafë”, ka thënë Erdogan.
