Update/ Detaje të reja janë bërë të ditura lidhur me vrasjen e një 43-vjeçari në Spanjë. Mediat spanjolle raportojnë se ngjarja ka ndodhur në Reus të provincës Tarragona në Katalonjë dhe është identifikuar si Fatmir A.,i dënuar më parë për vrasjen e një 26-vjeçari të ndodhur në Cambrils në shkurt të vitit 2008.
Policia spanjolle dyshon se 43-vjeçari Fatmir A. është ekzekutuar për hakmarrje.
Pas daljes nga burgu, shqiptari jetonte në Reus, në provincën e Tarragona, Katalonjë. 43-vjeçari u ekzekutua me armë rreth orës 00:45 të së mërkurës.
Kanë qenë banorët e zonës që lajmëruan policinë, e cila kur mbërriti në vendngjarje gjeti të shtrirë në tokë dhe të pajetë Fatmir A. Dëshmitarët u thanë hetuesve se dëgjuan disa të shtëna me armë. 43-vjeçari mendohet se u qëllua nga një person në distancë të afërt. Ky i fundit më pas u arratis me një makinë me xhama të zinj.
“Më 29 Shkurt të vitit 2008, 43-vjeçari shqiptar ekzekutoi me armë një 26-vjeçar në një pikë karburanti në Cambrils. Ai u arrestua më 20 Maj pas hetimeve të policisë, i cili u identifikua si autor i vrasjes së të riut. Në atë kohë, shqiptari mbante dokumente bullgare të falsifikuara. Krimi i ndodhur para 10 viteve u cilësua si larje hesapesh për çështje droge dhe prostitucioni”, shkruan media spanjolle.
Atentat i përgjakshëm ndaj shqiptarit, gjendet i vrarë
Një 43-vjeçar shqiptar është vrarë me armë zjarri, në Spanjë. Shqiptari është vrarë rreth orës 00:45 minuta, pasi është qëlluar me armë zjarri në Reus të provincës Tarragona në Katalonjë.
Ngjarja ka ndodhur në mesnatë, ku policia ka marrë një njoftim se një person ishte parë i shtrirë në tokë, në një rrugë të Reus, dhe kishte marrë plagë të shkaktuara nga armë zjarri, raporton media spanjolle diariodesevilla.es.
Kur agjentët arritën në vendin e ngjarjes, zbuluan se personi ishte shqiptar dhe kishte mbetur i vrarë nga të shtëna më armë zjarri. Shërbimi Mjekësor Emergjent (SEM) konfirmoi vdekjen e tij.
Agjentët e fushës së Hetimit Penal të Rajonit Policor të Tarragonës kanë marrë përsipër hetimin për të sqaruar shkaqet e ngjarjes.
Mediat spanjolle raportojnë se shqiptari është qëlluar nga një person brenda një makine të zezë. Nuk dihen ende detaje për identitetin e shqiptarit, ndërkohë që policia e ka gjetur të vdekur në vendin e ngjarjes. /TIRANA TODAY/
