Presidenti i Shteteve të Bashkuara, Donald Trump ka vendosur të nominojë gjyqtaren konservatore, Amy Coney Barrett në Gjykatën Supreme. Presidenti pritet që ta bëjë këtë njoftim në mbrëmjen e 26 shtatorit.
Duke iu përgjigjur pyetjeve të gazetarëve, Trump tha se ka vendosur për emrin që do të nominojë për Gjykatën Supreme, por nuk tregoi se për cilin kandidat bëhet fjalë.
Trump dhe republikanët në Senat janë zotuar se do të gjejnë zëvendësuesen e gjyqtares, Ruth Bader Ginsburg, gjyqtarja liberale që vdiq në moshën 87-vjeçare më 18 shtator.
Vdekja e Bader Ginsburg i jep mundësi republikanëve që të zgjerojnë shumicën e tyre konservatore në këtë gjykatë në 6 me 3, në kohën kur vendi është thellësisht i ndarë para zgjedhjeve të 3 nëntorit.
Gjykatësit e Gjykatës Supreme kanë mandat të përjetshëm dhe marrin vendime për çështje të ndjeshme politike, prej abortit dhe migracionit deri për çështjet e të drejtave civile dhe ligjeve për armët.
Demokratët, përfshirë edhe kandidatin presidencial, Joe Biden, kanë argumentuar se zëvendësi i Ginsburg, duhet të zgjidhet pas zgjedhjeve presidenciale.
