Një 21-vjeçare nga Ukraina është mbajtur me forcë në një dhomë hoteli në zonën e Shkëmbit të Kavajës. Autori i ngjarjes është 24-vjeçari Almarjo Xhebexhia, banues në Shkallnur, Durrës, i cili u arrestua në flagrancë nga specialistët për Krimet në Komisariatin e Policisë Durrës.
Sipas policisë, Xhebexhia ka ushtruar dhunë fizike tek një hotel në afërsi të Shkëmbit të Kavajës, duke i shkaktuar 21-vjeçares dëmtime të rënda. Po ashtu, ai e ka mbajtur pa dëshirën e saj të mbyllur në dhomën e hotelit shtetasen V.H., banuese në Ukrahinë.
E reja është dërguar në spital, ku ndodhet në terapi intensive. Materialet i kaluan Prokurorisë së Rrethit Gjyqësor Durrës për veprime të mëtejshme për veprat penale “Heqja e paligjshme e lirisë” dhe “Plagosja e rëndë me dashje”.
Dëshmia e 21-vjeçares, zbardhur nga BalkanWeb:
“Para disa muajsh u njoha me Marjon në Malin e Zi, ku ishim për pushime. Shkëmbyem numrat e telefonit dhe adresat tona dhe filluam të flisnim me njeri-tjetrin në Facebook dhe whatsapp. Sa vinte dhe bëheshim më të lidhur me njeri-tjetrin. Më pas Marjo më ftoi në Shqipëri si të dashurën e tij duke më kërkuar të njiheshim më shumë. Meqenëse unë nuk dyshoja tek ai për asgjë të keqe, erdha në Shqipëri. Kam ardhur disa herë. Si fillim u tregua i dashur, i mirë dhe më pas nisën episodet e dhunës. Dje më çoi në hotel dhe më dhunoi. Më ka rrahur në mënyrë brutale. Më kërcënonte se do më vriste. ‘Do të vras dhe këtu s’të gjen njeri’ më thoshte. Nuk e di pse më kërkonte të rrija në Durrës. Nuk e di çfarë qëllimi kishte”.
