Në ditën e dytë emigrantë vijuan protestën e tyre përpara kryeministrisë me thirrje dhe fjalime kundër qeverisjes së vendit. Në mbështetje ishin studentë, aktorë dhe banorët e Asirit e Bregut të Lumit.
Protesta e emigrantëve vijoi edhe të shtunën përpara Kryeministrisë. Gjatë mesditës shqiptarë të diasporës, banorë të Astirit, të Bregut të Lumit, aktorë dhe studentë u bashkuan në një protestë paqësore.
Ata u shprehën se protesta është një mënyrë për të treguar se reagimi i shqiptarëve ekziston dhe se duhet bërë ndryshimi.
“Na dhemb xhepi, prandaj dhe kemi dalë prej kohësh”
“Një shishe vaj në Shqipëri kushton 1800 lekë, ndërsa në Gjermani kushton 85 cent, atje ku unë jetoj. Jetojmë në një vend ku im atë pavarësisht se ka mbi 20 vjet shërben në radhët e policisë shqiptare, akoma dhe sot e blen uniformën vetë”
Vetë emigrantët thanë se edhe diaspora ka kërkesat e saj përkundrejt shtetit shqiptar.
“Themeli i demokracisë ka të bëjë me votën. Na duhet një kod i ri zgjedhor”, tha një emigrante.
Ndërsa studentët mbështetën protestën e diasporës, teksa e komentuan si propagandë shkarkimin e ish- Ministres së Arsimit Lindita Nikolla.
“Kjo nuk na bind, sepse nuk na intereson emri i ministres, na intereson që kërkesat tona të plotësohen”, tha një studente.
E diela në mesdrekë do të mbledhë sërish diasporën në protestë përballë Kryeministrisë.
