Kryeministri i Shqipërisë ka reaguar lidhur me ekzekutimit e politikanit serb Ivanoviç në Mitrovicë.
Në një postim në Facebook, Rama dënon aktin, ndërsa shton se përpjekjet për dialog dhe paqe s’duhen ndalur, por duhen thelluar.
“Keqardhje e thellë për tragjedinë e Oliver Ivanovic;akt qëllimkeq që nxit urrejtje e tension.Përpjekjet për dialogun e paqen s’duhen ndalur! Duhen thelluar!”, shkruan Rama.
Edhe presidenti Meta ka reaguar për ngjarjen e rëndë, teksa shprehet në një deklaratë:
Presidenti i Republikës, Sh.T.Z. Ilir Meta, shpreh keqardhjen e thellë dhe dënon ashpër vrasjen e politikanit serb të Kosovës, Liderit të Iniciativës Qytetare “Liria, Demokracia dhe Drejtësia”, Oliver Ivanovic.
Presidenti Meta shpreh gjithashtu besimin se autoritetet përkatëse do ta zbardhin sa më parë këtë akt kriminal dhe do të venë vënë përpara drejtësisë autorët.
Presidenti Meta bën thirrje për vlerësimin e situatës me qetësi e maturi dhe që ky akt kriminal të mos ndikojë në procesin e rëndësishëm të dialogut midis Serbisë dhe Kosovës, proces i cili është shumë i rëndësishëm për të ardhmen evropiane të të dy vendeve dhe për stabilitetin, paqen dhe sigurinë e rajonit tonë .
