Ish-ministri i Drejtësisë, Ylli Manjani ka reaguar lidhur me ngjarjen e rëndë që ndodhi sot në zonën e Xhamllikut, ku u ekzekutua gjyqtarja Fildes Hafizi.
Me anë të një postimi në Facebook, Manjani shkruan se ky është një lajm shokues, ndërsa e quan vrasjen “akt barbar”. Ish-ministri e përshkruan viktimën si një zonjë, nënë, juriste dhe gjyqtare shumë e zonja.
“Qytetaria sot u godit rëndë! Sistemi ligjor e shtetëror ende i trajton barbarët si qytetarë të barabartë! Kulmi i dështimit! Shteti që nuk mbron qytetarinë është i rrezikshëm!”, shkruan ndër të tjera Manjani, teksa i shpreh ngushëllime familjarëve.
POSTIMI I MANJANIT:
Lajm shokues!
Një zonjë, një nënë, një juriste dhe gjyqtare shumë e zonja humbi jetën nga dhuna barbare!
E humbi jetën pas një dhune permanente. Policia e Shtetit duhet ta dijë mirë këtë rast!
Fildesi ka qenë një studente ekselente. Përfundoi edhe Magistraturën shumë mirë.
Ishte një qytetare me rregulla dhe me moral e karakter të fortë!
Nuk ka më fjalë për këtë akt barbar!
Një provë tjetër e luftës ndërmjet Qytetarisë dhe Barbarisë! Qytetaria sot u godit rëndë!
Sistemi ligjor e shtetëror ende i trajton barbarët si qytetarë të barabartë! Kulmi i dështimit!
Shteti që nuk mbron qytetarinë është i rrezikshëm!
Na rrofshin, task-forcat; delta-forcat; forcat e armatosura se pikë force nuk kanë!!!
Na rrofshin edhe ligjet, gjykatat, policët, NGO, ministritë, deputetët, prokurorët, SPAK-erat e pesticide të tjera si këto! Nuk i duhen askujt!
Qytetarët dhunohen e vriten, barbarët gjykohen dhe shpëtojnë!
Nejse, ngushëllime të thella familjes!
