Emri i biznesmenit Vasil Dervishaj, 29-vjeç, nuk është një emër i panjohur për policinë. Viktima ka qenë i arrestuar më parë për “trafik të lëndëve narkotike”. Atentati ndodhi mbrëmjen e djeshme, në lagjen “Pavarësia”, tek ish-Kombinati i Peshkut, në Vlorë.
Mbi të riun është shtënë me armë, teksa ishte duke drejtuar makinën e tij me targa italiane, në rrugicën e shtëpisë. Pas krimit të rëndë, autorët janë larguar me shpejtësi nga rruga e pandriçuar, ndërsa i plagosuri, Dervishaj, arriti të dalë nga makina, por nuk u mbijetoi plagëve.
29-vjeçari jetonte në Vlorë dhe kishte në pronësi një lokal, një pikë bastesh, si dhe një magazinë me elektroshtëpiake.
I riu ka qenë i arrestuar më parë për “trafik të lëndeve narkotike”. Pas ngjarjes, policia ka nisur hetimet në disa pista, duke u përqendruar veçanërisht në atë të një krimi për hesape droge, dhe në një krim për shkak të hakmarrjes, pas një hasmërie të vjetër.
Gjithsesi, nuk ka ende asgjë zyrtare lidhur me shkakun, pasi policia thotë se është duke hetuar për ngjarjen.
Uniformat blu kanë ngritur pika kontrolli, dhe po krihet zona me qëllim kapjen e autorëve, të cilët dyshohet se janë larguar në drejtim të Fierit, për të humbur gjurmët.
