Avokati Mahmut Halimi ka nxjerrë në dritë të tjera detaje në lidhje me vrasjen e politikanit serb, Oliver Ivanoviq, në vitin 2018.
Halimi është avokati mbrojtës i Marko Roshiq, i cili akuzohet për përfshirje në vrasjen e politikanit. Avokati shprehet se ka shumë pamje ku shihet se si u vra Ivanoviq, si ra në tokë e si u largua vetura nga vendi i ngjarjes.
Në një prononcim për për portalin serb “Kosovo-Online”, Halimi thotë se në aktakuzën e klientit të tij nuk ka asnjë provë kundër. Ai thekson se në asnjë nga ato pamje nuk shihet klienti i tij.
“Dorëzimi i kamerave të sigurisë si provë materiale është mjaft profesionale dhe kjo për mua është shumë e domosdoshme. Unë i kam shikuar dhe analizuar shume materialet dhe në asnjë incizim të kamerave që kam parë deri më tani nuk dëshmon se në ato pamje shihet njëri nga klientët e mi. Në këto pamje shihet i ndjeri Oliver Ivanoviq, por nuk shihet se kush e ka vrarë atë. Gjithashtu, në kohën e vrasjes, në kthesë të rrugës shihet pak automjeti, por fytyrat e personave nuk mund të shihen dhe janë të paidentifikuara”, tha ai.
Oliver Ivanoviq, u vra në janar të vitit 2018, në hyrje të selisë së partisë së tij.
