Laçi është finalisti i parë o Kupës së Shqipërisë, pasi ka eliminuar Kukësin në “Zeqir Ymeri”. Edhe pse është mbyllur 1-1 festa ka qenë e kurbinasve, pasi ndeshja e parë në Laç ishte mbyllur në 0-0. Reginaldo, i kthyer në çështje në ditët e fundit, realizoi një gol me shumë peshë, duke zhvlerësuar finalizimin e Sindrit Gurit në pjesën e parë.
Ndeshja fillon mirë për Kukësin, vendasit ishin duke kontrolluar çdo pjesë të fushës, ndërsa Laçi karakterizoheshe nga gabimet në mbrojtje që e ka shoqëruar gjithë sezonin. Selmani bën një ndërhyrje të gabuar në minutën e 19’ ndaj Gurit dhe ndëshkohet me të verdhë, edhe pse kuksianët kontestuan tek arbitri për ti dhënë të kuqen. Goditjen e penalltisë e merr përsipër vetë Guri, që nuk gabon, duke shënuar golin e 22-të në total në kampionat dhe Kupë.
Avantazhi i pjesës së parë nuk i mjaftoi Kukësit t’u kualifikuar, pasi Laçi arriti të barazonte me Reginaldon në minutën e 78-të, pas krosimit të Lushkjes. Ky gol i shënuar në fushën kundërshtare mori vlerë të dyfishtë, pasi takimi i parë kishte përfunduar 0-0.
Minutat e fundit ofruan përplasje të forta në fushë, me kurbinasit që treguan grintë dhe iu afruan madje edhe golit të dytë me Kallakun, që u ndal nga portieri. Në përfundim të takimit pati tension në fushë, aq sa u desh ndërhyrja e forcave të rendit për të shoqëruar futbollistët e Laçit nga fusha.
