Një nga investitorët më të fuqishëm në botë në fushën e e turizmit, energjisë dhe bujqësisë, princi arab Lartësia e tij Alwaleed bin Talal bin Abdulaziz Al Saud sapo është ankoruar me jahtin e tij, Kingdom 5KR, në portin e Durrësit.
Duke iu referuar fushës së investimeve princi arab nuk gjendet rastësisht në Shqipëri. Për këtë arsye, ai do të takohet edhe me kryeministrin Edi Rama në zyrën e këtij të fundit në Kryeministri për të diskutuar rreth mundësive për të investuar në vendin tonë. Ndërsa mësohet se takimi disaorësh do të zhvillohet nën masa të rrepta sigurie.
Kjo vizitë është përgatitur dhe realizuar falë punës së bërë prej kohësh nga Ambasadori i Shqipërisë në Mbretërinë e Arabisë Saudite Sami Shiba.
Zbarkimi i investitorit arab duket se mund ta ndryshojë situatën e investimeve, kur në qeverisjen e kaluar të kryeministrit Rama nuk ka pasur asnjë investim serioz dhe me ndikim konkret në ekonomi. 
Megjithatë, thithja e investimeve të huaja pritet mund të marrë një kah pozitiv me qeverinë e re e cila nis punën në shtator. Dhe thithja e këtyre investimeve mund të nisë që nga takimi i sotëm midis Ramës dhe investitorit arab Alwaleed bin Talal bin Abdulaziz Al Saud. Ky i fundit, përveç investimeve në Mbreterinë e Arabise Saudite, e ka shtrirë aktivitetin e tij në Francë, Britani, SHBA dhe shumë vende të tjera me mundësi të mëdha për investime.
