Nuk ka kaluar më shumë se dy javë nga vendosja e skulpturës elegante në lulishten para Ministrisë së Ekonomisë dhe ajo është dëmtuar.
Skulptura është bërë nga artisti i mirënjohur Besart Pepa. Ajo është një vepër që u shpall fituese vjet në konkursin kombëtar qe u organizua nga Bashkia Tiranë. Ajo titullohet “Valltarët”.
Është një kompozim me dy figura ku ndërthurja e dy trupave krijon një lojë volumore dhe një harmoni formash, pasuar kjo edhe nga mënyra e trajtimit të formës ka nota disi erotike por jo shumë të forta.
Ka elemente të traditës siç është fustanella e figurës horizontale për ta lidhur me traditën e valltarit tonë shqiptar që mban veshur fustanellën karakteristike, dhe gjithashtu, finesa dhe qëndrimi pozant i figurës vertikale që të kujton valltaren shqiptare me duart në mes dhe me qëndrimin e saj lozonjar.
Është një përmasë e përshtatshme për një hapësirë parku e lartë rreth 2 m me 1.8m gjerësi. Materiali është mermer artificial ose beton artistik me përzierje pluhur mermeri e çimento e bardhë.
Reagimi i Artistit/ Si ndihet një artist kur i prishet puna nga njerëz që nuk e kanë idenë e madhështisë së artit?
Është një ndjesi e fortë. Sepse aty është derdhur emocioni i fortë i artistit dhe duket sikur është gjymtuar vet ai.
Promovimi kurimi dhe vëmendja nga Bashkia e institucionet kulturore për veprat e artit në përgjithësi, jo vetëm për punën time, duhet të jetë maksimal.
Për arsye se një vepër arti sidomos publike, është e vetmja mënyrë që ndikon konkretisht në emancipimin e asaj shtrese njerëzish që nuk din ku janë e ç’bëjnë në edukimin e brezave.
Në fotot e mëposhtme do të shihet qartë dëmtimi i bëra nga qytetar në pjesën e parakrahut të skulpturës.
Skulptori Pepa është autori i dhuratës së që ish-Presidenti i Republikës, Bujar Nishani i bëri Papa Françeskut me rastin e ardhjes së tij në Shqipëri.
Profili i Papa Klementit XI i cili u gdhend mjeshtërisht nga Pepa pasi u morr nga një monedhë e vjetër. (TIRANA TODAY)
