Debati i hartimit të listave të kandidatëve për deputetë të Partisë Demokratike prej disa ditësh po gumëzhin në çdo media të vendit.
Ajo që ra në sy pas dorëzimit të tyre në KQZ, ishte se në parlamentin e ardhshëm nuk do të jenë më shumica e themeluesve, si Jozefina Topalli, Ridvan Bode, Arben Imami, Astrit Patozi, Eduard Selami si dhe Majlinda Bregu.
Gjithashtu, u vu re edhe dorëheqja e disa prej kandidatëve që nuk pranuan të ishin pjesë e listave pasi sipas tyre nuk ishte normale përfshirja në vendet e fundit.
Ndryshe nga emrat e mësipërm, kryetari i Forumit Rinor të Partisë Demokratike, Belind Këlliçi, edhe pse është i pakënaqur vijon punë në terren për zgjedhjet e 25 qershorit.
I kontaktuar nga Tirana Today, Këlliçi u shpreh se vendimi i mospërfshirjes së tij në lista ishte surprizë totale për të.
“Ishte surprizë totale për mua mospërfshirja në lista, unë vijoj punën non stop në terren dhe mbështes strukturat”, tha Këlliçi.
Kujtojmë se në listën e Partisë Demokratike nuk janë kandiduar 24 deputetë aktualë, pothuajse gjysma e grupit parlamentar.
Vetë Basha kryeson listën e Tiranës, ku e treta renditet vajza e Azem Hajdarit, Rudina Hajdari dhe më pas lista vijon me Grida Dumën, Albana Vokshin, Jorida Tabakun dhe Sali Berisha i shtati.
