Gazetari Simon Shkreli është shkarkuar mbrëmë, së bashku me të shoqen, për shkak të një postimi që ka bërë në profilin e tij në Facebook.
Shkreli kishte 7 vite që punonte në televizionin TV1 Channel në Shkodër, por ka mjaftuar një postim për të zhdukur vite të tëra investim në këtë televizion.
“Shqipëria ka kenë e shkume për lesh, tash ka shku në p*** t’sams”, është ky postimi që solli shkarkimin e dyfishtë nga puna të gazetarit dhe të së shoqes së tij, po ashtu gazetare në TV1 Channel. Shkreli publikoi këtë status menjëherë pas zgjedhjes së Metës president, gjë që ka sjellë shkarkimin e tij dhe të bashkëshortes, duke qenë se ky televizion lokal është në pronësi të një deputeti të LSI-së.
Tirana Today ka kontaktuar me gazetarin Shkreli, i cili na ka treguar arsyen e vërtetë të këtij shkarkimi të dyfishtë, që iu komunikua mbrëmë fill pas përfundimit të prezantimit të edicionit qendror të lajmeve, së bashku me të shoqen, Elionën.
“Pas lajmeve të orës 20:00 të TV1 Channel në Shkodër, ku prezantuam edicionin qendror së bashku me bashkëshorten, na u komunikua vendimi i menaxhmentit të televizionit”, thotë Shkreli.
Tirana Today: Shkarkimin jua komunikuan gojarisht? A kishit një kontratë pune?
Simon Shkreli: Po. Kontratë pune nuk kam, ashtu siç nuk ka askush tjetër kontratë aty.
Tirana Today: Postimin kur e keni bërë? Mendoni se ishte vendim politik?
Simon Shkreli: Vendimi ishte politik, pasi erdhi menjëherë pas postimit tim pas zgjedhjes së Ilir Metës president. Statusi është bërë të premten, ndërsa shkarkimi është komunikuar mbrëmë pas prezantimit të edicionit.
Tirana Today: Ju sa kohë kishit që punonit në këtë televizion?
Simon Shkreli: Unë kisha 7 e gjysmë, ndërsa bashkëshortja ime Eliona, 6 vjet.
I pyetur nga redaksia e Tirana Today se çfarë ka ndërmend të bëjë pas shkarkimit, gazetari shprehet se do kërkojë një tjetër vend pune, pasi nuk mund të hapë gjyq për shkak se nuk ka një kontratë me këtë televizion, pavarësisht shkarkimit të padrejtë nga puna.
Të drejtat e njeriut, fatkeqësisht duket se mbeten vetëm teorike në vendin tonë, aty ku të duhet të zgjedhësh mes lirisë së shprehjes dhe vendit të punës./ Tirana Today
