Gjatë natës, dy shpërthime eksplozivi kanë tronditur qytetin e Shkodrës. Shpërthimi i parë është dëgjuar rreth orës 02:20 dhe vetëm pas 10 minutash është dëgjuar edhe shpërthimi tjetër.
Nga informacionet paraprake bëhet me dije se eksplozivi i është vendosur dy bizneseve, njëri në zonën afër Prefekturës, dhe tjetri në vendin e quajtur “Rruga e Gjere”.
Rezulton se njeri prej bizneseve, në zonën afër Prefekturës, është në pronësi të ish kandidatit për kryetar bashkie, Xhemal Bushati, raporton “Shqiptarja”. Ky i fundit kishte banesën në katin e tretë të objektit, ndërsa biznesi ishte në katin e parë.
Shpërthimi tjetër është regjistruar në një supermarket të ndodhur në vendin e quajtur “Rruga e Gjere”. Raportohet se dëme kanë pësuar edhe Prefektura dhe biznese të tjera përreth. Është ende e paqartë nëse dy shpërthimet kanë lidhje me njëri-tjetrin, ndërsa policia ka nisur hetimet.
