Një pacient gëlltit një pilulë prej sheqeri e cila në fakt nuk përmbante asnjë ilaç aktiv, apo i nënshtrohet një“operacioni” në të cilin bëhen disa prerje, por nuk kryhet procedura terapeutike.
E megjithatë dhimbja zvogëlohet, të përzierat ndalen, humori i pacientit ngrihet.
Ndonjëherë, përmirësimet do të ndodhnin gjithsesi pa ndonjë ndërhyrje. Por herë të tjera, ajo që hyn në lojë është fuqia e mendjes që ndikon tek trupi. Ky efekt i famshëm i placebo, ka një histori të gjatë dhe të pasur, dhe sigurisht që ka luajtur një rol të madh në mjekësinë e shekujve të kaluar, kur pilulat dhe ilaçet e padobishme ishin shpesh gjithçka që mjekët kishin për t’iu ofruar të sëmurëve.
Shumë ndër dijetarët e kohë se dinin se me çfarë kishin të bënin. “Ka njerëz mbi të cilët funksionon thjesht edhe vetëm të parit e ilaçeve”-shkroi filozofi francez Mishel dë Montenj
në vitin 1572. Demonstrimi i parë shkencor i efektit placebo u krye në vitin 1799, kur mjeku britanik Xhon Hejgart, nisi të shiste disa shufra të shtrenjta metalike,të cilat ai pretendonte se nxirrnin çdo lloj sëmundje nga trupi.
Hejgart zbuloi se 4 nga 5 pacientët me reumatizëm raportuan se dhimbjet e tyre ishinzbutur. Ai i botoi gjetjet e tij në librin me titull“Mbi imagjinatën si shkak dhe si kurë e çrregullimeve të trupit”.Hejgart nuk e përdori termin “efekti placebo” për atë që kishte parë.
Megjithëse termi “placebo” ishte përdorur prej kohësh në kontekste të tjera, por siç e njohim sot u prezantua në një studim të vitit 1920 në revistën mjekësore britanike “The Lancet”. “Efekti Placebo” hyri në gjuhën popullore klinike disa dekada më vonë, kur anestezisti amerikan Henri K.Besher vuri re se disa burra të plagosur nga fushat e betejës së Luftës së Dytë Botërore, i duronin dhimbjet e plagëve edhe pa morfinë.
Që atëherë, shumë studime të kryera mbi Efektet Placebo, tregojnë se ato janë më të forta në kushtet kur perceptimet janë thelbësore, si dhimbja, ankthi dhe depresioni. Me nxitjen e Besher, Placebot nisën të përdoren në mënyra të reja në epokën moderne shkencore.
Ato u shndërruan në shtyllën kryesore të testeve klinike për të kuptuar më mirë efektet e vërteta të një ilaçi real. Në formën më të pastër të testeve të tilla, vetëm një nëngrup i pjesëmarrësve në studim merr një substancë që po testohet.
Të tjerët marrin një substancë të rreme, dhe askush nuk e di se kush e ka marrë njërën apo tjetrën deri në shpalljen e rezultateve të studimit. Mund të thuhet se një ilaç funksionon vetëm kur i kalon ndjeshëm Efektet Placebo dhe në një mënyrë statistikisht të rëndësishme. Sigurisht, fakti që placebo mund të ndikojë tek perceptimet dhe simptomat e pacientëve e ndërlikon jo pak çështjen:Kjo do të thotë që një ilaç që po testohet duhet të performojë jo vetëm më mirë se asgjëja, por duhet të garantojë më së miri fuqinë e mendjes mbi trupin.
Burimi i lajmit: https://www.discovermagazine.com/mind/the-imagination-effect-a-history-of-placebo-power
Përshtatur nga TIRANA TODAY
