Çmimi i platformës së lojërave elektronike “PlayStation 5” do të rritet nga kjo e enjte me rreth 50 dollarë në Shtetet e Bashkuara, pasi gjiganti japonez i teknologjisë po përballet me rritjen e kostove dhe ngadalësimin e tregut të lojërave.
“Si shumë biznese të tjera globale, kompania po has sfida të ambientit ekonomik”, ka deklaruar Isabelle Tomatis, zëvendës presidente e sektorit të marketingut të firmës.
Të gjitha platformat “PlayStation 5” do të pësojnë rritje, me më të shtrenjtën që do të jetë versioni “Pro”, që pritet të shkojë në 750 dollarë.
Rritja e çmimeve vjen pasi presidenti Donald Trump vendosi tarifa ndaj shumicës së partnerëve tregtarë të Amerikës, përfshirë Japoninë, duke shtuar frikën për rritjen e kostove.
“Kemi marrë vendimin e vështirë për të rritur çmimin e shitjes për platformat “PlayStation 5” në Shtetet e Bashkuara duke filluar nga 21 gushti”, ka nënvizuar përfaqësuesja e kompanisë.
Kështu, modeli bazë i “PlayStation 5” do të kushtojë 500 dollarë në Shtetet e Bashkuara, ndërsa çmimet e aksesorëve të tij do të mbeten të pandryshuara.
Importuesit amerikanë të mallrave japoneze aktualisht përballen me një tarifë prej 15 për qind për produktet që shesin.
Më herët gjatë vitit, “Sony” i rriti çmimet e platformave në Mbretërinë e Bashkuar dhe në Evropë, duke cituar si motive inflacionin e lartë dhe luhatjen e kuotave të këmbimit.
